Հայկական ընկերությունն Աբու-Դաբիում կամիկաձե դրոններ ու պենտակոպտերներ է ցուցադրել

Հայկական Pride Systems ընկերությունը Արաբական Միացյալ Էմիրությունների մայրաքաղաք Աբու-Դաբիում ընթացող IDEX-2021 ցուցահանդեսին ներկայացրել է անշարժ թևով և փոփոխվող աղեղնաձև թևերով կամիկաձե դրոնը: Ընկերությունը ներկայացրել է նաև պենտակոպտեր: Հաղորդվում է, որ ներկայացված մոդելները կարող են կրել բեկորաֆուգասային կամ կոմուլյատիվ հակատանկային արկեր:

Ավելի վաղ սոցցանցերում լուսանկարներ էին շրջանառվում IDEX-2021-ում հայկական տաղավարից, որը դատարկ էր։ ՀՀ Բարձր տեխնոլոգիական արդյունաբերության նախարարությունը հայտարարել էր, որ առաջացած լոգիստիկ խնդիրների հետևանքով հայկական ռազմական տեխնիկայի ցուցանմուշները ժամանակին չեն հասել Աբու Դաբի։

ԲՏԱ նախարարը նաև հայտնել էր, որ IDEX 2021 միջազգային ռազմարդյունաբերական ցուցահանդեսին մասնակցում են 14 հայկական ընկերություններ: Հաղորդվել է, որ դրանք ներկայացնելու են հայկական ռազմարդյունաբերության պրոդուկտներն ու լուծումները։ Բացի այդ` հնարավորություն են ունենալու` գտնել վաճառքի նոր շուկաներ, նոր կապեր և գիտելիքներ ձեռք բերել նորագույն ռազմարդյունաբերական արտադրանքի վերաբերյալ։

«IDEX»-ը պաշտպանական տեխնոլոգիաների և սպառազինության ամենահեղինակավոր միջազգային ցուցահանդեսներից է, իսկ միջինարևելյան ու հյուսիսաֆրիկյան տարածաշրջանում՝ ամենամասշտաբայինը: Ցուցահանդեսը կշարունակվի մինչև փետրվարի 25-ը: