Ադրբեջանում նույնպես անտառային հրդեհներ են
Յարդիմլիի անտառներում նախորդ օրը բռնկված հրդեհը դեռ չի հաջողվել մարել: Միևնույն ժամանակ հաղորդվում է, որ անտառային հրդեհներ են տարածվում նաև Լենքորանի շրջանում:
Ադրբեջանի հարավային շրջաններում նույնպես անտառային հրդեհներ են բռնկվել: Ինչպես հաղորդվում է, նախորդ օրն անտառային հրդեհներ են բռնկվել Յարդիմլիի շրջանում: Այդ տարածքում դեռևս հրդեհը մարված չէ, իսկ այժմ հաղորդվել է նաև Լենքորանի շրջանի Օսակյուչի անտառներում, Գիրկանսկի ազգային պարկին սահմանակից տարածքում տարածվող հրդեհի մասին:
Մասնավորապես, լեռնային բարդ տեղանքում գտնվող Մոլոժա գյուղի մոտակայքում է հրդեհը տարածվում: Հրդեհաշիջման աշխատանքներին ներգրավված են հրդեհային պաշտպանության պետական ծառայության ստորաբաժանումները, ԱԻՆ-ի ավիացիոն ջոկատի ուղղաթիռ:
Ինչպես հաղորդվում է, հրդեհի մարման աշխատանքներին մասնակցում են նաև Ադրբեջանի ԱԻՆ ճգնաժամային կառավարման կենտրոնի ուժերը, Հատուկ վտանգի փրկության և Հարավային տարածաշրջանային կենտրոնի ծառայությունները` թվով 130 մարդ: Հրշեջներին աջակցում են նաև տեղի բնակիչները, Էկոլոգիայի և բնական պաշարների նախարարության անտառտնտեսության կենտրոնի աշխատակիցները:
Ադրբեջանի հարավային անտառներում բռնկված հրդեհներն արդեն ընդգրկել են շուրջ 15 հեկտար տարածք: Հաղորդվում է, որ չնայած գործադրվող ջանքերին, արդեն երկրորդ օրն է, ինչ ադրբեջանական ծառայություններին չի հաջողվում տեղայնացնել հրդեհները:
Մեկնաբանությունները