Ֆիլմի նկարահանումների համար Թոմ Կրուզը կմեկնի Միջազգային տիեզերակայան
Հայտնի դերասան Թոմ Կրուզը և ռեժիսոր Դագ Լայմանը Crew Dragon-ով կուղևորվեն Երկրի ուղեծիր: Տիեզերքում առաջին գեղարվեստական ֆիլմի նկարահանման հայտ է ներկայացրել նաև «Ռոսկոսմոսը»:
Միջազգային տիեզերակայանի (ՄՏԿ) հաջորդ երեք տարիների երթուղին հրապարակվել է Space Shuttle Almanac-ի թվիթերյան էջում: Թռիչքների ծրագրում ներառված է նաև Crew Dragon տիեզերանավով «զբոսաշրջային ուղևորություն», որի մասնակիցները կլինեն հայտնի դերասան Թոմ Կրուզը և ռեժիսոր Դագ Լայմանը:
Տեղեկություններ կան, որ դերասանը և ռեժիսորը տիեզերք են մեկնելու ապագի ֆիլմի մի մասն այնտեղ նկարահանելու նպատակով: Ֆիլմի անվանումը դեռևս հայտնի չէ: Թռիչքին մասնակցելու են նաև ամերիկացի տիեզերագնաց-հետազոտող Մայքլ Էլադիո Լոպես-Ալեգրիան և ևս մեկ ուղևոր, ում անունը չի նշվում: Հնարավոր է՝ նա պրոդյուսերը կլինի կամ օպերատորը:
Այն մասին, որ հոլիվուդյան դերասանը տիեզերքում մարտաֆիլմի նկարահանումների համար կուղևորվի Միջազգային տիեզերակայան, հայտնի էր դարձել դեռևս մայիսի սկզբին: Այն ժամանակ NASA-յի տնօրեն Ջիմ Բրայդենստայնը նշել էր, որ Գործակալությունում շատ ուրախ են ՄԿՏ-ում նկարահանվող ֆիլմի շրջանակներում Թոմ Կրուզի հետ աշխատելու համար:
Տեղեկություններ կան նաև, որ իր ֆիլմը կամ մի մասը Երկրի ուղեծրում գտնվող ՄՏԿ-ում նկարահանելու մտադրություն ունեն ռուսաստանցի պրոդյուսերները և «Ռոսկոսմոսը»:
Վերջինիս կողմից նկարահանվելիք ֆիլմում դիպաշարը նախատեսում է դեպի ՄՏԿ թռիչքն իրականացնել 2021թ. աշնանը:
Մեկնաբանությունները