Ավիացիայի նախկին պետը ձերբակալվել է ժամկետնանց հրթիռները թանկ գնով ՊՆ-ին վերավաճառելու մեղադրանքով — Շեշտ.am (shesht.am)
5 րոպե
Խմբագրություն

Ավիացիայի նախկին պետը ձերբակալվել է ժամկետնանց հրթիռները թանկ գնով ՊՆ-ին վերավաճառելու մեղադրանքով

Մատակարարված ժամկետնանց հրթիռների մի մասը չեն կրակվել և դուրս են հանվել հաշվեկշռից, իսկ մնացածն ընդհանրապես չեն կիրառվել, այդ թվում՝ 44-օրյա պատերազմի ժամանակ:

Զինատեսակների ցուցադրություն / © Shantnews

Ազգային անվտանգության ծառայությունը բացահայտել է, որ Զինված ուժերի ավիացիայի նախկին պետը չարաշահել է պաշտոնեական դիրքը՝ ձեռք բերելով պիտանելիության ժամկետները լրացած, տեխնիկական վիճակը պահանջվող նորմերին չհամապատասխանող հրթիռներ՝ շուկայականից բարձր գնով:

Մասնավորապես, առանց շուկայում նույնատիպ ապրանքի գնի համեմատական վերլուծության, ձևականորեն կատարված սակարկությունների արդյունքում փոխադարձ պայմանավորվածությամբ մեկ միավոր հրթիռի գինը սահմանվել է 1100 ԱՄՆ դոլար և, հաշվի չառնելով ՊՆ-ում նույնատիպ հրթիռներ ձեռք բերելու իրական պահանջարկը, ներկայացրել է մեծ քանակությամբ հրթիռների գնման հայտ:

ԱԱԾ հաղորդմամբ՝ բարձրաստիճան զինվորականը տեղեկացված է եղել, որ դեռևս 2011թ. 1985-1991թթ. արտադրության հրթիռներ են ներմուծվել Հայաստան, դրանց մի մասը ՀՀ պաշտպանության նախարարության կողմից մատչելի գնով է ձեռք բերվել, օրացույցային ժամկետներն անցած են եղել, նպատակային օգտագործման համար պիտանի չեն, և որ մատակարար ընկերությանը վերադարձման են ենթակա, իսկ հետագա պահպանության համար ՀՀ ՊՆ-ին ի պահ են հանձնված:

Արդյունքում կնքված պայմանագրի մաս կազմող տեխնիկական բնութագիրը, ինչպես հաղորդվում է, համապատասխանեցվել է փաստացի ՊՆ-ում ի պահ հանձնված ապրանքի տվյալներին՝ դրանում նշելով նաև ձեռք բերվող ապրանքը «երկրորդ կարգ» պահանջին համապատասխանելու վերաբերյալ նշում, ինչը թույլ է տվել անտեսել օրացույցային ժամկետները: Ընկերության հետ կնքվել է հրթիռները 2,277,323,840 ՀՀ դրամով ձեռք բերելու վերաբերյալ պայմանագիր:

Բայց սա դեռ ամենը չէ. ԱԱԾ տեղեկացմամբ՝ նույն անձը չի իրականացրել ապրանքի զննում և փորձարկում, իր նախագահությամբ գործող հանձնաժողովի կողմից կազմված պաշտոնական փաստաթուղթ հանդիսացող նյութական միջոցների ընդունման ակտում, կազմված պայմանագրի կամ դրա մասի կատարման արդյունքների վերաբերյալ եզրակացությունում ներառել է անհամապատասխանություններ չլինելու, բոլոր ապրանքները տեխնիկական բնութագրերին համապատասխան լինելու վերաբերյալ բովանդակությամբ կեղծ տեղեկություններ և տվել դրական եզրակացություն:

Այս գործողությունների հետևանքով Զինված ուժերի կենտրոնական պահեստ են ընդունվել ժամկետնանց, տեխնիկական բնութագրերին չհամապատասխանող, երկարատև պահպանման համար ոչ պիտանի, շուկայական արժեքից էականորեն բարձր գնով հրթիռներ, որի հիման վրա մատակարար ընկերության հաշվին անհիմն փոխանցվել է առանձնապես խոշոր չափերի՝ 2,277,323,840 ՀՀ դրամին համարժեք, 4.655.200 ԱՄՆ դոլար գումար:

Մատակարարումից որոշ ժամանակ անց, ինչպես նշվում է, հրթիռների մի մասը չեն կրակվել և դուրս են հանվել հաշվեկշռից, իսկ մնացածն ընդհանրապես չեն կիրառվել, այդ թվում՝ 44-օրյա պատերազմի ժամանակ:

ԱԱԾ հաղորդմամբ՝ ՀՀ զինված ուժերի նախկին բարձրաստիճան պաշտոնատար անձը ձերբակալվել է:

Ամենաընթերցվածը

[miniorange_social_login]

Մեկնաբանությունները

Գրել մեկնաբանություն
Հաստատեք
Մուտք գործեք
Մուտք գործելով Դուք համաձայնվում եք կայքի օգտագործման օրենքների հետ.