ԱՄՆ Պետդեպի ներկայացուցիչը կայցելի Վրաստան, Հայաստան և Ադրբեջան
Հունիսի 6-13-ը Ֆիլիպ Ռիքերը Երևանում և Բաքվում քննարկելու է Լեռնային Ղարաբաղի հակամարտության հետ կապված հարցերը, իսկ Թբիլիսիում` «Ռուսաստանի կողմից ագրեսիայի և վրացական տարածքների օկուպացման» խնդիրը:
Միացյալ Նահանգների Պետդեպարտամենտի հաղորդմամբ` պետքարտուղարի` Եվրոպայի և Ասիայի հարցերով օգնականի պարտականությունները կատարող Ֆիլիպ Ռիքերը հունիսի 6-ից 13-ն այցելելու է տարածաշրջան` Թբիլիսի, Երևան և Բաքու:
Ինչպես հաղորդվում է, այցի նպատակը երկկողմ և տարածաշրջանային առաջնահերթությունների խթանումն ու տարածաշրջանում ժողովրդավարությանը և տնտեսական զարգացմանն աջակցությունն են:
ԱՄՆ Պետդեպարտամենտի ներկայացուցիչը Հայաստանում և Ադրբեջանում հանդիպելու է իշխանության, քաղաքացիական հասարակության և գործարար շրջանակների ներկայացուցիչների հետ` քննարկելու երկկողմ առաջնահերթությունները և Լեռնային Ղարաբաղի հակամարտության հետ կապված հարցերը:
Վրաստանում Ռիքերը հանդիպելու է կառավարության, ընդդիմության և քաղհասարակության անդամների հետ: Շեշտվում է, որ քննարկվելու են երկու թեմաներ. «Ռուսաստանի կողմից ագրեսիան և վրացական տարածքների օկուպացիան», ինչպես նաև ապրիլի 19-ին իշխող կուսակցության և ընդդիմության մի մասի միջև քաղաքական ճգնաժամից դուրս գալու նպատակով ստորագրված համաձայնության իրականացումը:
Մեկնաբանությունները