Չինաստանում նոր տեսակի վիրուսային թոքաբորբի բռնկում է գրանցվել

Չինաստանի Յուհան քաղաքի 60 բնակիչ հիվանդանոց է դիմել նոր վիրուսային թոքաբորբի ախտանիշով: Նրանցից առնվազն 15-ը վարակված են եղել միևնույն շտամով: Այն կորոնավիրուս է, ատիպիկ թոքաբորբի վիրուսի և սուր շնչառական համախտանիշի ազգակից է: Ինչպես նախորդ դեպքերում, հիվանդները, հավանաբար, կորոնավիրուսով վարակվել են կենդանիներից: Սակայն դեռ չկան հիմքեր համարելու, որ նոր թոքաբորբը նույնպես վտանգավոր է: Դեռևս չնակ նաև ապացույցներ, որ այն մարդկանց միջև է փոխանցվում:

2000-ականների սկզբին աշխարհում տարածվել են վիրուսային թոքաբորբի (պնևմոնիա) 2 համաճարակ: Դրանք էին MERS-ը (մերձավորարևելյան շնչառական համախտանիշ, Middle-East respiratory syndrome) և SARS-ը (ծանր սուր շնչառական համախտանիշ (ատիպիկ թոքաբորբ), severe acute respiratory syndrome): Այս 2-ը միասին 1,5 հազար մարդու մահվան պատճառ են դարձել և մինչ օրս Առողջապահության համաշխարհային կազմակերպությունը (ԱՀԿ) խստորեն հետևում է թոքաբորբի ցանկացած դեպքի:

Ատիպիկ թոքաբորբի համաճարակ Չինաստանում 2002թ. է սկսվել, և երկրի իշխանությունները երկար ժամանակ այդ մասին տեղեկությունը գաղտնի են պահել, ինչը կարող էր վիրուսի տարածման պատճառ դառնալ: Այդ պատճառով նոր բռնկումը, որն արձանագրել են Յուհան քաղաքի իշխանությունները 2019թ. դեկտեմբերին, իր վրա է սևեռել ոչ միայն ԱՀԿ-ի, այլև հարևան երկրների ուշադրությունը:

Թոքաբորբի նոր դեպքերը գրանցվել են դեկտեմբերի կեսերին: Ամանորին մոտ հիվանդանոց է տեղափոխվել 27 հիվանդ` բարձր ջերմաստիճանով, մի մասի մոտ սկսել է շնչառությունը դժվարանալ: Բոլորն էլ կապ են ունեցել Յուհանի ծովամթերքի մեծածախ շուկայի հետ: Վարակվածներից շատերը շուկայում ունեցել են առանձին վաճառակետեր:

Հունվարի սկզբին հիվանդների քանակն արդեն 59-ն էր: Նրանց հարազատներն ու ընկերները՝ մոտ 150 մարդ, գտնվել են հսկողության ներքո: Հարավային Կորեայում ևս մի կին հիվանդացել է` Չինաստանից մեկնելուց հետո: Սակայն նա ոչ մի կերպ շփում չի ունեցել ծովամթերքի շուկայի հետ, ուստի մինչ օրս հայտնի չէ վարակվելու պատճառը:

Չինացի գիտնականներն ուսումնասիրել են հիվանդներից վերցված նմուշները և եզրակացրել են, որ նրանցից առնվազն 15-ը միևնույն վիրուսով են վարակված: Սեքվենավորման արդյունքներով այն դասել են կորոնավիրուսների շարքին: Այս ընտանիքում արդեն կա մարդու համար 6 տեսակի պաթոգեն: Նրանցից 4-ը սովորական մրսածություն են առաջացնում, իսկ 2-ը՝ զարգացնում MERS և SARS: Այդուհանդերձ, վտանգավորությունը դեռ պարզ չէ: Հիվանդներից 8-ն արդեն առողջացել են:

Ենթադրվում է, որ MERS և SARS վիրուսները մարդկանց փոխանցվել են չղջիկներից: Պարզվել է, որ ծովամթերքի շուկայում վաճառվում են նաև կենդանի օձեր, ոչխարներ ու ճագարներ, որոնք կարող էին չղջիկներից փոխանցման միջնորդ հանդիսանալ: Ներկայումս Յուհանի մեծածախ շուկան փակ է:

Վերջերս գիտնականները հնդկական չղջիկների ու նրանց որսացող մարդկանց արյան մեջ հայտնաբերել են էբոլա վիրուսի նոր տեսակ: Պարզվել է նաև, որ գրիպի վիրուսը հակավիրուսային դեղամիջոցների նկատմամբ դիմակայություն է ձեռք բերում և մարդու օրգանիզմի համար մրցակցում է մրսածության հետ: