Կինը կտրել է ձեռքը՝ 1 մլն եվրո ապահովագրավճար ստանալու համար, սակայն գումարն այդպես էլ չի ստացել. փոխարենը՝ ձերբակալվել է
Սլովենիայում դատարանը երկու տարվա ազատազրկման է դատապարտել երիտասարդ կնոջն այն բանի համար, որ նա միտումնավոր կտրել էր ձեռքը՝ հսկայական ապահովագրավճարը ստանալու նպատակով:
22-ամյա Յուլիա Ադլեսիչը դատարանում փորձել է ապացուցել, թե դժբախտ պատահարը տեղի է ունեցել ծառի ճյուղերը շրջանաձև սղոցով կտրելու ժամանակ: Հետաքննությունը, սակայն, պարզել է, որ դեպքից մի քանի ամիս առաջ կինը և նրա ամուսինը ապահովագրական հինգ պայմանագիր են կնքել՝ հույս ունենալով ապահովագրական հատուցման արդյունքում ստանալ 1 մլն եվրո:
Բացի Ադլեսիչից՝ Լյուբլյանայի դատարանն այդ ապահովագրական խարդախության մեջ մեղավոր է ճանաչել նաև նրա ամուսնուն՝ Սեբաստիան Աբրամովին, և նրա հորը. Աբրամովը դատապարտվել է 3 տարվա ազատազրկման, իսկ հայրը՝ պայմանական մեկ տարվա: Գործով անցել է նաև Աբրամովի մայրը, բայց անմեղ է ճանաչվել:
Նրանք բոլորն են իրենց մեղքը չեն ընդունել: Կնոջ պնդմամբ՝ դեպքը տեղի է ունեցել Աբրամովի հոր տանը՝ 2019թ. հունվարին: Սակայն ոստիկանությունն ուշադրություն է դարձրել այն հանգամանքի վրա, որ ամուսինը տուժածին հիվանդանոց է տեղափոխել, սակայն ձեռքի կտրված մասը չի տարել:
Հետաքննությունը հաստատել է, որ դա տեղի է ունեցել միտումնավոր՝ ցմահ հաշմանդամության համար: Սակայն ոստիկանները կարողացել են ձեռքի կտրված հատվածը ժամանակին հասցնել հիվանդանոց, ինչի շնորհիվ այն կարել են իր տեղում:
Հաստատվել է նաև, որ դրանից մի քանի օր առաջ Աբրամովը համացանցում որոնել է պրոթեզով ձեռքի աշխատանքի սկզբունքը:
Ուշագրավ է, որ Աբրամովը կասկածյալի կարգավիճակ ունի նախկին ընկերուհու սպանության գործով, ով 2015թ. պատահաբար սպանվել է հրաձգային վիրավորումից:
Մեկնաբանությունները