Մոսկվայում մահացել է առաջին պացիենտը, ում մոտ կորոնավիրուս էր հայտնաբերվել (upd.)
Իշխանություններն ընդգծում են, որ տարեց կինը մահացել է ոչ թե Covid-19-ից, այլ նրա մոտ առկա բազմաթիվ խրոնիկ հիվանդություններից:
Ռուսաստանում նոր կորոնավիրուսից մահվան առաջին դեպքն է գրանցվել: Հաղորդվում է, որ մահացածը 79-ամյա կին է, ում մոտ նախորդ շաբաթ էր վիրուսը հայտնաբերվել:
2-րդ ինֆեկցիոն հիվանդանոցի գլխավոր բժիշկ Սվետլանա Կրասնովան նշել է, որ տարեց պացիենտը մի շարք խրոնիկ հիվանդություններ ուներ՝ ներառյալ շաքարային դիաբետ՝ 2-րդ տիպի, աթերոսկլերոզ, սրտի հիպերտոնիկ հիվանդություն: Պացիենտին ցուցաբերվել է համալիր ինտենսիվ թերապիա՝ ռեանիմացիայի պայմաններում: Բուժման մարտավարությունը համաձայնեցվել է վարչության ոչ հաստիքային գլխավոր մասնագետների հետ:
Իշխանությունները նշել են, որ մահվան պատճառը ոչ թե Covid-19-ն է, որը կնոջ մոտ հայտնաբերվել է մարտի 14-ին, այլ «թոքաբորբ՝ զուգահեռ շատ ծանր պաթոլոգիայի ֆոնին»: Մահացածի հետ շփում ունեցածները հետազոտվելու են, առայժմ նրանց մոտ կորոնավիրուսի ծանր ախտանշաններ ի հայտ չեն եկել:
Ռուսաստանի կորոնավիրուսային վարակի դեմ պայքարի օպերատիվ շտաբը հիշեցրել է, որ վարակային հիվանդությունների բարդացումը ծանր են տանում հատկապես 60-ն անց մարդիկ, ուստի հենց նրանց պետք է հեռու պահել վարակվելուց և փորձել նվազեցնել շփումներն ու այցելությունը հանրային վայրեր:
Մարտի 19-ի առավոտվա դրությամբ աշխարհում SARS-CoV-2 վիրուսով վարակված է 218825 մարդ: Նրանցից 8,8 հազարը մահացել է, ավելի քան 84 հազարը՝ առողջացել: Կորոնավիրուսի պանդեմիան տարածվել է ավելի քան 145 երկրներում և բոլոր մայրցամաքներում՝ բացառությամբ Անտարկտիդայի:
UPD. Դիահերձմամբ պարզվել է, որ կնոջ մահվան պատճառը թոքային զարկերակի երկկողմանի հոծ թրոմբոէմբոլիան (թոքային էմբոլիա): Ավելի վաղ մահվան պատճառ էր նշվել թոքաբորբը՝ զուգահեռ շատ ծանր պաթոլոգիայի ֆոնին:
Մոսկվայի գլխավոր պաթոլոգաանատոմ, բժշկական գիտությունների դոկտոր Օլեգ Զայրաթյանցը հայտարարել է, որ չնայած պացիենտը հոսպիտալացվել է թոքաբորբի սկսվող ախտանշաններով և նրա մոտ մինչև մահանալը հայտնաբերվել է կորոնավիրուս, մահը վրա է հասել ոչ թե թոքաբորբից, այլ պոկված թրոմբից: Մահվան պահին թոքերում փոփոխություն չի եղել: Կնոջ մոտ հաստատվել է նաև ուղեկցող խրոնիկ ծանր հիվանդությունների առկայությունը:
Մեկնաբանությունները