Այս տարի արդեն 311 վարորդ զրկվել է վարորդական իրավունքից, բայց ոչ ոք բալային համակարգով չի զրկվել
Վարչապետ Նիկոլ Փաշինյանը նշել է, որ վարորդական իրավունքից զրկման պատճառների մեջ գերակշռում է ոչ սթափ վիճակում վարելը: Կան նաև առանց պետհամարանիշի, չթույլատրված ձայնային ազդանշանով ու փարոսիկներով վարելու դեպքեր:
ՀՀ վարչապետ Նիկոլ Փաշինյանն իր ֆեյսբուքյան ուղիղ եթերով անդրադարձել է վերջին շրջանում քննարկվող թեմաներից մեկին՝ ճանապարհային երթևեկության տուգանային միավորների («բալային համակարգ») խնդրին: Ի պատասխան դրանց անհամաչափության մասին բարձրաձայնումներին՝ Նիկոլ Փաշինյանը նշել է, որ հունվարի 1-ից սկսած բալային համակարգի պատճառով ոչ մի վարորդ վարորդական իրավունքից չի զրկվել:
Վարչապետի խոսքով՝ մինչ օրս 311 վարորդ է զրկվել վարորդական իրավունքից, բայց բոլորն էլ կոպիտ խախտումների հետևանք են: Ըստ վիճակագրության՝ վարորդներից 27-ը վարորդական իրավունքից զրկվել են ավտոմեքենան առանց պետհամարանիշի վարելու համար: Նիկոլ Փաշինյանն ուշադրություն է հրավիրել հատկապես ոչ սթափ վիճակում վարելու դեպքերին. 16 հոգի զրկվել է կրկնակի ոչ սթափ վիճակում վարելու համար, 6 հոգի՝ սթափության վիճակի զննությունից խուսափելու, իսկ 180 հոգի վարորդական իրավունքից զրկվել է խմածության 0.5 միլիգրամից ավելի (մոտ կես շիշ օղի) չափի համար:
ՃՈ հրահանգին չենթարկվելու և փախուստի դիմելու համար վարորդական իրավունքից զրկվել են 2-ը, առանց հիմնավորման հատուկ ազդանշան և փարոսիկներ տեղադրելու համար՝ 3 հոգի: Վարչապետը նշել է, որ 77 հոգու նկատմամբ, բացի վարորդական իրավունքից զրկումը, նաև քրեական գործեր են հարուցվել:
Նիկոլ Փաշինյանը նշել է, որ, համաձայն ոստիկանության կանխատեսումների, բալային համակարգի կիրառման արդյունքում վարորդական իրավունքից հավանական զրկումներ տեղի կունենան մարտի վերջ — ապրիլ սկզբներին: Վարչապետի խոսքով՝ առաջին զրկումներն արձանագրվելուց հետո համապատասխան վերլուծություն կիրականացվի՝ իրավիճակը գնահատելու և ըստ անհրաժեշտության փոփոխություններ կատարելու նպատակով:
«Երբ բալային համակարգով առաջին զրկումները կարձանագրվեն, մենք խորը վերլուծության կենթարկենք հասկանալու համար, թե ինչ անենք, որ հանրային անվտանգությունն ավելի բարձր մակարդակի լինի»,- նշեց Փաշինյանը:
Վարչապետը կարևորել է իրականացվող փոփոխությունների արդյունքում հանրային անվտանգության մակարդակի բարձրացումը՝ կոչ անելով պահպանել ճանապարհային երթևեկության կանոնները, հարգել օրենքը: Փաշինյանն ընդգծել է, որ, չնայած 2019թ. ընթացքում շուրջ 150 հազար մեքենաների ներմուծմանը, վթարների քանակը հունվար-փետրվար ժամանակահատվածի համար նախորդ տարվա համեմատ նվազել է:
Իրանական աղբյուրը տեղեկացնում է, որ Թուրքիան ու Բաքուն մտադրություն են ունեցել հանկարծակի հարձակում ձեռնարկել Հայաստանի Սյունիքի մարզի վրա, որպեսզի արգելափակեն Իրանի ճանապարհը դեպի Եվրոպա:
Մատակարարված ժամկետնանց հրթիռների մի մասը չեն կրակվել և դուրս են հանվել հաշվեկշռից, իսկ մնացածն ընդհանրապես չեն կիրառվել, այդ թվում՝ 44-օրյա պատերազմի ժամանակ:
Քանի դեռ վերլուծական շրջանակներում փորձում են վեր հանել Իրանի և Ադրբեջանի միջև լարվածության իրական պատճառներն ու հնարավոր զարգացումները, Իրանի ԻՀՊԿ-ի գլխավոր շտաբի պետը հայտարարում է, որ իրանական հրթիռները կարող են հասնել Բաքու և ոչնչացնել այն:
Մեկնաբանությունները