Բասերմանի համոզմամբ` Արցախում պատերազմը չի վերսկսվի, քանի դեռ ռուս խաղաղապահներ կան

Հայտնի խորագիտակ, հրապարակախոս և քաղաքական խորհրդատու Անատոլի Բասերմանն անդրադարձել է նախորդ` 2020թ. ընթացքում աշխարհում տեղի ունեցած լրջագույն գործընթացներին: Մասնավորապես` խոսել է կորոնավիրուսային համավարակի, նրա հետևանքների, ինչպես նաև Արցախյան 2-րդ պատերազմի:

Պատասխանելով պատերազմում հայկական կողմի կրած պարտության պատճառների վերաբերյալ հարցին` Բասերմանը նշել է, որ ոչ միայն համավարակն էր ստեղծել նպաստավոր պայմաններ, այլև ամեն ինչ նախապես ծրագրվել էր: Նա հիշեցրել է, որ դեռևս 2018թ. հեղափոխության օրերին Նիկոլ Փաշինյանի հակառակորդները հայտարարում էին, որ «Փաշինյանը գալիս է հողերը հանձնելու»:

Պարտության պատճառներից Բասերմանն առանձնացրել է կադրային քաղաքականությունը հատկապես հետախուզական կառույցներում: Նրա խոսքով` մարտական փորձառություն ունեցող գեներալները տարբեր պատճառներով հեռացված էին համակարգից: Փորձառուներին փոխարինած հետախույզները, Բասերմանի համոզմամբ, լիովին չեն տիրապետել իրենց աշխատանքին, այդ պատճառով աչքաթող է արվել Ադրբեջանի պատրաստությունը պատերազմին:

Բասերմանը պնդում է, որ այն դեպքերում, երբ շարքային հետախույզների զգուշացումները հաճախ պատշաճ ուշադրության չեն արժանացել հետախուզական և հակահետախուզական ստորաբաժանումների ղեկավարների կողմից:

Անատոլի Բասերմանի խոսքով` պարտված երկրները ձգտում են ռևանշի. Ադրբեջանին նույնպես դա վերաբերում է: Բաքուն Արցախը կորցնելուց հետո պատրաստվել է հակահարձակմանը` զորքը մարզելով, զինատեսակներ ձեռք բերելով: Ընդ որում` զենք է գնել տարբեր երկրներից` Ռուսաստանից, Թուրքիայից և այլն:

Բասերմանը նշում է, որ Հայաստանն այդ ամենին ուշադրություն չի դարձրել նաև Փաշինյանից առաջ` ոգևորված հաղթողի կոչումով:

Իրավիճակի փոփոխության վերաբերյալ հարցին պատասխանելիս` Բասերմանն ընդգծել է, որ քանի դեռ Արցախում ռուս խաղաղապահներ են տեղակայված, ռազմական գործողություններ տեղի չեն ունենա: Սակայն նա չի բացառել, որ միմյանց վրա ճնշումների այլ գործիքներ չեն կիրառվի:

Բասերմանը չի բացառել նաև, որ Վրաստանը կշարունակի մասնակցել Հայաստանի տնտեսական շրջափակմանը, և որ Թուրքիան փորձելու է ավելին ստանալ: Նրա խոսքով` տնտեսական պատերազմները սովորաբար ավելի վտանգավոր կարող են լինել, քան` թեժ մարտերը: