Գարեգին Նժդեհի մասին ելույթները՝ ԱՊՀ գագաթնաժողովին
Ալիևը Գարեգին Նժդեհին անվանեց «դավաճան», իսկ Փաշինյանը մանրամասն ներկայացրեց, թե ինչպես է Նժդեհը պայքարել թուրքերի դեմ, Ցեղասպանության դեմ ու հանուն հայրենիքի:
Թուրքմենստանի մայրաքաղաք Աշխաբադում ընթանում է Անկախ պետությունների համագործակցության անդամ-երկրների ղեկավարների նիստը, որին մասնակցում են նաև Հայաստանի վարչապետ Նիկոլ Փաշինյանը և Ադրբեջանի նախագահ Իլհամ Ալիևը:
Հոկտեմբերի 10-ին ԱՊՀ երկրների արտգործնախարարների մասնակցությամբ կայացել էր նիստ, որտեղ հավանություն էր տրվել Հայրենական մեծ պատերազմում տարած հաղթանակի 75-ամյակի կապակցությամբ ուղերձի նախագծին: Այլ հարցերից բացի՝ նախագծի ընդունման հարցը ներառված էր այսօր՝ հոկտեմբերի 11-ին, կայացած ԱՊՀ գագաթնաժողովի օրակարգում:
Գագաթնաժողովի ընթացքում ելույթով հանդես եկավ Ադրբեջանի նախագահը: Վերջինս այստեղ էլ անմասն չմնաց հայատյացությունն ընդգծելու հարցում և իր խոսքում անդրադարձավ Հայաստանի ազգային հերոս Գարգեին Նժդեհի կենսագրությանը: ՀՀ վարչապետ Նիկոլ Փաշինյանը պատասխանեց Ալիևին՝ մանրամասն ներկայացնելով պատմական եղելությունը և Ադրբեջանի ղեկավարին մեղադրեց պատմական փաստերը խեղաթյուրելու մեջ:
Ալիևը՝ Նժդեհի մասին
Ադրբեջանի նախագահ Իլհամ Ալիևը, խոսելով Մեծ Հայրենական պատերազմում Ադրբեջանի ավանդի մասին, դժգոհություն էր հայտնել Երևանում Գարեգին Նժդեհի արձանի կանգնեցման հանգամանքից:
Ալիևը, մասնավորապես, նշել է, որ պետությունների ղեկավարները բազմիցս դեմ են արտահայտվել ֆաշիզմի հերոսացման, սակայն ներկայումս այդպիսի երևույթ դիտվում է Հայաստանում: Ադրբեջանի նախագահի համոզմամբ՝ Գարեգին Տեր-Հարությունյանը, ում արձանը կանգնեցված է Երևանում, Գարեգին Նժդեհ անունով ծառայել է ֆաշիստներին:
Ալիևը Հայաստանին մեղադրել է ֆաշիզմը հերոսացնելու մեջ, իսկ Նժդեհին համարել «ֆաշիստական դահիճ» և «դավաճան»: Նախկին իշխանությունների կողմից արձանը կանգնեցնելը և մինչ օրս չապամոնտաժելը Ալիևը համարել է Հայաստանի կողմից «ցինիկություն»:
Փաշինյանը՝ Ալիևի կողմից պատմությունը կեղծելու մասին
ՀՀ վարչապետ Նիկոլ Փաշինյանը, պատասխանելով Ալիևի հայտարարությանը, Ադրբեջանի նախագահին մեղադրեց պատմական փաստերը խեղաթյուրելու մեջ: ՀՀ վարչապետը քննադատեց Ալիևին՝ ԱՊՀ գագաթնաժողովի հարթակն օգտագործելով սեփական անհիմն տեսակետներն արտահայտելու մեջ՝ դրանով վիրավորելով ներկաներին ու մասնակիցներին:
Փաշինյանը նշեց, որ Ալիևի խոսքից տպավորություն է ստեղծվում, թե Ադոլֆ Հիտլերը երկրորդական դերակատարում է ունեցել, իսկ ֆաշիստական շարժումը ղեկավարել է Գարեգին Նժդեհը:
Փաշինյանն ընդգծել է, որ Նժդեհն իրականում պայքարել է թուրք զավթիչների դեմ, պայքարել է Ցեղասպանության դեմ, որն իրականացրել են թուրքերը: Չլինելով պատմաբան՝ Նիկոլ Փաշինյանը ներկայացրել է այն պայքարը, որ Գարեգին Նժդեհը ռուս զինվորականների հետ միասին մղել է թուրքերի դեմ:
Անդրադառնալով Ալիևի կողմից Նժդեհին «դավաճան» որակելուն՝ Նիկոլ Փաշինյանը հայտարարել է, որ Գարեգին Նժդեհը մահացել է Վլադիմիրի բանտում: Խորհրդային ժամանակաշրջանի բազմաթիվ գործիչներ են մահացել Վլադիմիրի բանտում: ՀՀ վարչապետը նշել է, որ 1937-1950-ականների բոլոր դատապարտվածները ժողովրդի դավաճաններ չեն եղել:
Փաշինյանն անտեղի է համարել Ալիևի խոսքերը՝ նշելով, որ Հայաստանում պատերազմի վետերաններին պատշաճ ուշադրություն է դարձվում. վերջին ամիսներին նաև մի շարք որոշումներ են կայացվել՝ պատերազմի վետերաններին տրամադրվող աջակցության բարձրացման և այլն:
Մեկնաբանությունները