Անհանգստացնող լուրեր Բեյրութից. թրքամետ ուժերը սպառնալիքներ են հնչեցրել հայերի հասցեին
Հունիսի 11-ի գիշերը մերձթուրքական խմբավորումներն Անկարայի հրահրմամբ ահաբեկիչ ցույցեր են սկսել ընդդեմ լիբանանցի հայերի: Նրանք հակահայկական, ցեղասպանությունն արդարացնող վանկարկումներ են հնչեցրել՝ ծածանելով թուրքական դրոշը և իրենց կոչելով Էրդողանի զինվորներ:
Թեև Լիբանանում իրավիճակն արդեն տևական ժամանակ է, որ լարված է, սակայն նախօրեին այն առավել սրվել է այն պատճառով, որ լիբանանցի ներկայացող ինչ-որ մեկը Whats Up-ով սպառնացել է տեղի նշանավոր հայ լրագրող Նշան Դերու Հարությունյանին, ով հաղորդում է վարում «Ալատիտի» հեռուստաալիքով: «Լիբանանցին» հայ լրագրողին անվանել է գաղթական և օտարերկրացի: Նշանն իր հերթին հակաճառել է նրան և ընդգծել, որ Էրդողանը, Թուրքիան և օսմանները նենգ են:
Հաղորդման ավարտից անմիջապես հետո (որին մասնակցում էր լիբանանցի հայտնի քաղաքական գործիչ Վայամ Վահաբը) տասնյակ մարդիկ, որոնցից շատերը Լիբանանի բնակիչներ չեն, դուրս են եկել փողոց՝ վանկարկումներում արդարացնելով օսմանների կողմից իրականացված ցեղասպանությունը, հայերին անվանելով նենգ ու այդ սպանություններին արժանի: Ոմանք նույնիսկ հպարտացել են, որ օսմանների հետնորդներ են ու Էրդողանի զինվորներ:
Բեյրութում «Շանթ» հեռուստաընկերության թղթակից Սաքո Արեյանը (Սագօ Արեան) նշել է, որ Լիբանանում նման զարգացումներն անսպասելի չէին, քանի որ վերջերս ուժգնացել են Անկարայի նկրտումներն այդ երկրի նկատմամբ:
Նրա խոսքով՝ Լիբանանի հյուսիսում թուրքական կողմն իր ազդեցության հաստատման համար գործի է դնում կրոնը, գումարը և այլ միջոցներ:
Մեկնաբանությունները