Տեղեկություններ կան, որ Թուրքիան զենք է մատակարարում Լիբանանում իրեն հավատարիմ խմբավորմանը
Լիբանանի ռազմական հետախուզությունը տեղեկություններ է ստացել, որ Թուրքիան մարդասիրական օգնության անվան ներքո զենք է ուղարկում Լիբանանում գործող «Մուսուլման եղբայրներ» խմբավորմանը:
Վերջին օրերին տեղեկություններ են տարածվում, որ Թուրքիան զենք է մատակարարում Լիբանան, որտեղ գործում է ոչ մեծ, սակայն բավարար ակտիվ խմբավորում՝ իսլամիստական «Իհվան ալ-Մուսուլման» («Մուսուլման եղբայրներ») կազմակերպությունը: Աղբյուրների տվյալներով՝ զենքի առաքումն իրականացվում է մարդասիրական օգնության անվան ներքո (Լիբանանին մարդասիրական օգնություն տրամադրվում են բազմաթիվ պետություններ՝ Բեյրութի ուժգին պայթյունից հետո):
Արաբական աղյուրների հաղորդմամբ՝ լիբանանցի դիվանագետները հաստատել են, որ այդպիսի տեղեկություն կա, սակայն իսկությունը դեռևս չեն կարող հաստատել: Լիբանանյան ռազմական հետախուզությունը նույնպես արձագանքել է թուրքական հատուկ ծառայությունների կողմից զենքի մատակարարման մասին լուրերին՝ նշելով, որ հետախուզությունն իսկապես ունի նման տեղեկություններ:
Լիբանանցի դիվանագետը, ում անունը չի նշվում, հայտնել է, որ հետևում են տեղի ունեցողին, կապի մեջ են ԱՄՆ-ի վարչակազմի հետ, սակայն դեռևս ապացույցներ չունեն:
Հաղորդվում է, որ Թուրքիան փորձում է օգտվել Լիբանանում ստեղծված անկայուն իրավիճակից և ուժեղացնել ազդեցությունը նրա վրա: Հայտնի է, որ Էրդողանն աջակցում է լիբանանյան «Մուսուլման եղբայրներին»: Վերջերս թուրքական էներգետիկ երկու բարժաներ կայանել են Լիբանանի ափերին՝ աջակցելու լիբանանյան էներգետիկ համակարգի վերականգնմանը: Պայթյունից 3 օր անց թուրքական աղբյուրները հրապարակեցին Բեյրութին աջակցելու՝ Անկարայի պատրաստականության մասին:
Բեյրութի պայթյունից մի քանի օր անց դեպքի վայր ժամանեցին Թուրքիայի փոխնախագահը և արտգործնախարարը և հայտարարեցին, որ Անկարան պատրաստ է վերականգնել ավերված նավահանգիստը: Ուշագրավ է, որ այդ պատրաստակամության հիմքում նշվել է «աջակցությունը տեղի թուրքերին ու թուրքմեններին»: Վերջիններիս առաջարկվել է Թուրքիայի քաղաքացիություն ընդունել:
Լիբանանում թուրքական գործոնի ակտիվացումը ոչ միայն վտանգավորություն է ներկայացնում լիբանանյան իշխանությունների և ինքնիշխանության համար, այլև տեղի հայ համայնքի: Վերջինս ակտիվ ներգրավված է Լիբանանի հասարակական-քաղաքական և ռազմական կյանքին, ինչի կապակցությամբ թուրքամետ ուժերի կողմից բազմիցս հակահայկական ակցիաներ են կազմակերպվել Բեյրութում՝ նպատակ ունենալով տարածաշրջան չեզոքացնելու հայկական դերակատարությունը:
Մեկնաբանությունները