Ինչո՞ւ Կառավարությունը Covid-19-ի նոր ալիքի դեմ չի պայքարում
Նշվում է, որ «Փաշինյանը պատերազմն ավելի շուտ չի կանգնեցրել` վախենալով իշխանությունը կորցնելուց, և ներկայումս խիստ սահմանափակումներ չի մտցնում` նույն պատճառով»:
Կորոնավիրուսով վարակվածության նոր դեպքերի թիվն այսօր, երկարատև ընդմիջումից հետո, կրկին գերազանցեց 1000-ը (1024): Վերջին 24 ժամում Հայաստանում Covid-19-ից 19 մարդ է մահացել: Տելեգրամյան ալիքը սա զարմանալի չի համարում` հաշվի առնելով, որ Առողջապահության նախարարը Sputnik V պատվաստանյութն անվանում է «սպուտնիկ 5»:
Նշվում է, որ Կառավարությունը ներկայումս միջոցներ չի ձեռնարկում կորոնավիրուսի հերթական ալիքը կանգնեցնելու ուղղությամբ: Ենթադրվում է, որ այդ ալիքը պայմանավորված է նոր շտամմներով, քանի որ հին շտամմների նկատմամբ Հայաստանի բնակչությունն արդեն քիչ թե շատ կոլեկտիվ իմունիտետ ունի:
Հայաստանում նախորդ տարվա ընթացքում շուրջ 10 հազար մարդ է մահացել պատերազմի և կորոնավիրուսի հետևանքով: Վարակի տարածման ներկայիս ցուցանիշները հուշում են, որ այս տարի նոր ալիքը կրկին մահացությունների մեծ թվի կհանգեցնի:
Ընդգծվում է, որ Հայաստանի Հանրապետությունում նոր շտամմների թեստավորում չի իրականացվում` համապատասխան հնարավորությունների բացակայության պատճառով:
Տելեգրամյան ալիքը կորոնավիրուսի դեմ պայքարի ուղղությամբ տարվող քաղաքականությունը համեմատում է պատերազմի հետ` նշելով, որ «Փաշինյանը պատերազմն ավելի շուտ չի կանգնեցրել` վախենալով իշխանությունը կորցնելուց, և ներկայումս խիստ սահմանափակումներ չի մտցնում նույն պատճառով»:
Շեշտվում է, որ ՀՀ կառավարությունը ոչ թե կանխարգելում է, այլ փորձում է հետևանքները վերացնել:
Մեկնաբանությունները