Թուրքիայում պետական հեղաշրջման նոր փորձ են կանխատեսում
Թուրք լրագրողի կարծիքով` գործող նախագահ Էրդողանի և նրա կուսակցության դեմ «տարօրինակ իրադարձություններ» են ծավալվում, որոնք հիշեցնում են 2016թ. հուլիսի 1-ի նախօրեի դեպքերը:
Թուրքիայի մերձիշխանական հայտնի լրագրողուհի Հիլյալ Քափլանն օրերս հրապարակված իր հոդվածում ակնարկել է այդ երկրում հնարավոր պետական հեղաշրջման փորձի մասին:
Նրա կարծիքով, ինչպես հաղորդվում է, գործող նախագահ Ռեջեփ Թայիփ Էրդողանի և նրա կուսակցության դեմ «տարօրինակ իրադարձություններ» են ծավալվում, որոնք հիշեցնում են 2016թ. հուլիսի 1-ի նախօրեի դեպքերը (ռազմական հեղաշրջման փորձ, խմբ.): Ուշագրավ է համարվում, որ հինգ տարի առաջ, հեղաշրջման փորձից ամիսներ առաջ նույն լրագրողն իր «Մենք պատրաստ ենք» հոդվածում կանխատեսել էր հնարավոր ապստամբությունը:
Լրագրողի վերջին հոդվածը բուռն քննարկումների պատճառ է դարձել թուրքական հարթակներում: Մի մասը նրան մեղադրում է թուրք հասարակության ուշադրությունը հրդեհների դեմ պայքարում կառավարության թերացումից շեղելու մեջ` կասկածամտորեն վերաբերվելով հերթական «կանխատեսմանը»:
Սակայն թուրքական բնակչության շրջանում ամրապնդվում է համոզմունքը, որ Էրդողանի կառավարությունն իսկապես չի կարողանում արդյունավետ պայքար մղել անտառային հրդեհների դեմ, ինչպես նաև հաղթահարել երկրում առկա տնտեսական խնդիրները:
Մեկնաբանությունները