Օր 21. Հաղթանակը հեշտ չի տրվելու. այն ծանր է ու կախված է յուրաքանչյուրիցս. Արծրուն Հովհաննիսյան. ԹԱՐՄԱՑՎՈՂ

0:20 Առաջնագծում իրավիճակը խաղաղվեց. Վահրամ Պողոսյան:

23:56 Արցախի Հանրապետության նախագահի մամուլի խոսնակ Վահրամ Պողոսյանը նշել է, որ Ադրբեջանի կողմից մարդասիրական զինադադարի ռեժիմի պահպանման դեպքում Արցախի Պաշտպանության բանակը պատրաստ է շրջափակման մեջ գտնվող ադրբեջանական զորքերին մարդասիրական միջանցք տրամադրել:

22:21 Հայաստանի Հանրապետությունը և Ադրբեջանի Հանրապետությունը որոշել են հոկտեմբերի 18-ին, տեղական ժամանակով ժամը՝ 00:00-ից հաստատել մարդասիրական զինադադար:

ՀՀ ԱԳՆ հաղորդմամբ՝ որոշումը կայացվել է՝ ի շարունակություն ԵԱՀԿ Մինսկի խմբի համանախագահ երկրները ներկայացնող Ֆրանսիական Հանրապետության, Ռուսաստանի Դաշնության և Ամերիկայի Միացյալ Նահանգների նախագահների հոկտեմբերի 1-ին արված հայտարարության, ԵԱՀԿ Մինսկի խմբի համանախագահների հոկտեմբերի 5-ի արված հայտարարության և համաձայն հոկտեմբերի 10-ին Մոսկվայում ընդունված համատեղ հայտարարության:

22:05 Գեղարքունիքի մարզպետ Գնել Սանոսյանը հայտնել է, որ մինչ այս պահը մարզում խոցվել է 18 ԱԹՍ՝ Վարդենիսի, Մարտունու և Գավառի տարածաշրջանում:

22:02 Հարավային ուղղությամբ հակառակորդի ձեռնարկած լայնածավալ գրոհը հետ է շպրտվել. Արծրուն Հովհաննիսյան:

19:10 Արցախի նախագահը հայտարարել է, որ այսօր պաշտպանական բնագծի գրեթե ողջ երկայնքով ռազմական գործողությունները ինտենսիվ կերպով շարունակվել են: Հատկապես ծանր է եղել հարավային ուղղությամբ: Արայիկ Հարությունյանի հաղորդմամբ՝ Պաշտպանության բանակը փայլուն է իրականացնում իր առջև դրված մարտական խնդիրը՝ թշնամուն հասցնելով կենդանի ուժի և զինտեխնիկայի զգալի կորուստներ:

18:30 ԱՄՆ-ում ՀՀ արտակարգ և լիազոր դեսպան Վարուժան Ներսեսյանը հայտնել է, որ աշխատանքներ են տարվում ՀՀ ԱԳ նախարար Զոհրաբ Մնացականյանի այցը Վաշինգտոն նախապատրաստելու ուղղությամբ:

18:15 Այսօր ժամը 16:30-17:45-ի հատվածում ՀՕՊ ստորաբաժանումները ՀՀ օդային տարածքում խոցել են հակառակորդի 3 ԱԹՍ, ևս մեկը ոչնչացվել է Արցախի երկնքում. Շուշան Ստեփանյան:

15:22 Արցախի նախագահի արտաքին հարաբերությունների հարցերով խորհրդական Դավիթ Բաբայանը նշել է, որ Ադրբեջանը խախտում է հրադադարի ռեժիմը և դաշտերում է թողնում բազմաթիվ դիակներ՝ ստեղծելով սանիտարական վտանգներ:

12:30 Ադրբեջանի ՊՆ հայտարարությունը, թե, իբր, հոկտեմբերի 17-ին խոցել են հայկական կողմին պատկանող Սու-25 ինքնաթիռ, հերթական ապատեղեկատվությունն է. հայտնում է Շուշան Ստեփանյանը:

10:51 Պաշտպանության բանակը հրապարակել է Ադրբեջանի Գյանջա քաղաքում տեղակայված լեգիտիմ ռազմական նշանակետերի ցանկը.

— ՊՆ ՌՕՈւ ռազմաօդային բազա, ուղղաթիռային ավիաէսկադրիլիա,
— ԶՈՒ ԳՇ մոտոհրաձգային բրիգադի ՄՏՎ,
— ՆԶ առանձնահատուկ նշանակության բրիգադ,
— ՊՆ մարտական կառավարման կենտրոն,
— ԶՈՒ ԳՇ ռադիոտեխնիկական գումարտակ,
— ՊՆ կենտրոնական ենթակայության վառելիքաքսուկային նյութերի բազա,
— Պաշտպանական արդյունաբերության նախարարության մեքենաշինական գործարան, ավիացիոն վերանորոգման գործարան և հրետանու սպառազինության վերանորոգման գործարան:

10:14 Գիշերային հրթիռակոծության հետևանքները. Արցախի Պաշտպանության բանակը տեսանյութ է հրապարակել:

9:20 Banak.info-ի Դավիթ Թորոսյանը հայտնում է, որ առավոտյան ժամը 4-ից հրթիռակոծվում է մայրաքաղաք Ստեփանակերտը: Նրա խոսքով՝ մինչև հիմա հնչում է օդային տագնապի ազդանշանը։

8:50 Պաշտպանության բանակի հաղորդմամբ՝ լուսադեմին թշնամական ուժերը, հերթական անգամ խախտելով հումանիտար հրադադարը, վերսկսել են հրթիռահրետանային հարվածները խաղաղ բնակավայրերի ուղղությամբ: Առավել ինտենսիվ հարվածներ են հասցվել Ստեփանակերտի և Շուշիի քաղաքացիական ենթակառուցվածքներին:

8:40 Արծրուն Հովհաննիսյանը կոչ է արել վեր կենալ և քայլ անել մեր գոյության պատերազմի համար։ «18-25 տարեկան զինվորներն ու սպաները արդեն 20 օր բոլորիս համար արհամարհում են մահը, արժանի լինենք նրանց»։

8:30 ՊՆ ներկայացուցչի խոսքով՝ երեկ Շուշիին ու Ստեփանակերտին ավելի հզոր միջոցներով են հարվածել:

2:10 ՀՀ հակաօդային պաշտպանական համակարգերի կողմից արձանագրվել է ադրբեջանական անօդաչու թռչող սարքերի թռիչքներ Հայաստանի Հանրապետության Սյունիքի մարզի Խնածախ, Արծվանիկ, Դավիթ Բեկ բնակավայրերի ուղղությամբ, որի ժամանակ նաև հարվածներ են հասցվել տեղում ՀՀ ԶՈՒ ենթակառուցվածքների ուղղությամբ՝ վնասելով նաև քաղաքացիական ենթակառուցվածքներ: Բարեբախտաբար զոհեր և վիրավորներ չկան:

2:00 ՀՀ օդային տարածքում ՀՀ ԶՈՒ ՀՕՊ ստորաբաժանումները խոցել են հակառակորդի երկու ԱԹՍ։

1:00 Շուշան Ստեփանյանի հաղորդմամբ՝ ՀՀ օդային տարածքում հայտնաբերվել են հակառակորդի ԱԹՍ-ներ։ Ձեռնարկվում են համապատասխան միջոցներ։