Հաճախորդ չկա, բայց մոլերը չեն փակվում և վարձավճար են պահանջում (upd.)

Նոր տեսակի կորոնավիրուսի տարածումից խուսափելու համար փակվել են հայ-իրանական և հայ-վրացական սահմանները, դադարեցվել են ուսումնական գործընթացները նախակրթական և կրթական հաստատություններում, առնվազն մինչև մարտի 23-ը չեն գործելու նաև մշակութային կենտրոնները, բազմաթիվ մարմիններում աշխատանքներն իրականացվում են առցանց տարբերակով:

Դադարեցվել է նույնիսկ Սահմանադրական փոփոխությունների հանրաքվեի քարոզարշավի ակտիվ ընթացքը, գերատեսչություններ կոչ են անում զանգվածային հավաքներ չկազմակերպել և չմասնակցել դրանց, խորհուրդ է տրվում հետաձգել նաև հարսանիքները, շատ հյուրեր նախատեսող միջոցառումները և այլն:

Այդ ամենին զուգահեռ՝ Երևանում շարունակում են գործել առևտրի խոշոր կենտրոնները՝ մոլերը, որտեղ նույնիսկ այս օրերին կազմակերպվում են գովազդային խաղարկություններ:

Բազմաթիվ օգտատերեր կոչ են անում փակել այդ կենտրոնները:

Միևնույն ժամանակ, ինչպես մենք տեղեկացանք, որոշ մոլերում հաճախորդներ գրեթե չկան, սակայն աշխատանքներն, այդուհանդերձ, չեն դադարեցվում: Մեր աղբյուրի վստահեցմամբ՝ առևտրի կենտրոնի տնօրինությունը կենտրոնի տարածքում գործող փոքր վաճառասրահներին (բուտիկներին) թույլ չի տալիս փակել դրանք՝ սպառնալով տույժերով (հավանաբար այդպիսին է պայմանագիրը):

Նախօրեին հայտնի դարձավ, որ Ամերիաբանկը երեք ամսով հետաձգել է վարկերի մարումները: Նման կոչով դիմել էին ֆեյսբուքյան օգտատերեր, Լուսահով Հայաստան խմբակցության ղեկավար Էդմոն Մարուքյանը պաշտոնապես դիմել էր Կենտրոնական բանկին:

Օգտատերերը կոչ են անում առևտրի խոշոր կենտրոններում նույնպես վարձավճարների հետաձգում թույլատրել, քանի որ հաճախորդների, ըստ այդ և՝ եկամտի խնդիր է առաջանում:

Հիշեցնենք, որ եվրոպական երկրների մեծ մասում կորոնավիրուսի տարածմամբ պայմանավորված փակվել են գրեթե բոլոր խանութներն ու վաճառակետերը՝ բացառությամբ առաջին անհրաժեշտության մթերքի: ԱՄՆ-ում հայտարարվել է արտակարգ դրություն:

Հայաստանում կորոնավիրուս հայտնաբերվել է 15 մարդու մոտ: 200-ին մոտ քաղաքացիներ մեկուսացված են: Ինքնամեկուսացել են նաև Վարչապետ Նիկոլ Փաշինյանը և Աննա Հակոբյանը. նրանց թեստի արդյունքները պարզ կլինեն այսօր երեկոյան:

UPD 1. «Երևան Մոլը» հայտարարություն է տարածել՝ հայտնելով, որ մարտի 16-23-ն առևտրի կենտրոնը փակ է լինելու: Գործելու է միայն Քարֆուր սուպերմարկետը:

Հայտարարությունում նշված է նաև, որ տարածքում գործող վարձակալների գործարար բարօրությունը չի անտեսվելու:

UPD 2. «Դալմա Գարդեն Մոլը» նույնպես հայտարարեց, որ մարտի 16-23-ը չի գործելու: Կազմակերպությունը կոչ է արել մնալ տանը, թեյ խմել, ֆիլմ դիտել, վայելեք մտերիմների ներկայությունը:

Նշվում է, որ կազմակերպությունը կունենա ֆինանսական կորուստներ, սակայն առաջին հերթին արժևորվում են մարդու առողջությունը, հաճախորդների, աշխատակիցների և գործընկերների բարօրությունը։

Էջանիշ

Պատճենել հղումը

Email

Տպել

Twitter

VK

Telegram