Փորձագետները փորձել են բացատրել ՉԹՕ-ների վերաբերյալ Պենտագոնի հրապարակած տեսանյութերը — Շեշտ.am (shesht.am)
8 րոպե
Խմբագրություն

Փորձագետները փորձել են բացատրել ՉԹՕ-ների վերաբերյալ Պենտագոնի հրապարակած տեսանյութերը

ԱՄՆ Պաշտպանության նախարարությունը մանրակրկիտ վերլուծությունից հետո որոշել է պաշտոնապես հրապարակել իբր «չբացահայտված թռչող օբյեկտների» արձանագրած տեսանյութերը: Զինվորականների խոսքով՝ փորձել են ցույց տալ, որ դրանք իրական նկարահանում են, չնայած ավելի շուտ էին հայտնվել համացանցում: Սակայն այդպես էլ չի նշվել, թե ինչ է երևում տեսանյութերում:

«ՉԹՕ-ների» տեսանյութերը / © U.S. Department of Defense

ԱՄՆ Պաշտպանության նախարարությունը երեք տեսանյութեր է հրապարակել, որոնք արվել են ամերիկյան ՌԾՈՒ-ի օդաչուների կողմից՝ վարժական թռիչքների ժամանակ: Դրանցում երևում է նրանց հանդիպումը «չբացահայտված թռչող օբյեկտների» հետ: Տեսանյութերը նկարահանված են 2004 և 2015 թվականներին և մինչ օրս գաղտնի են եղել, սակայն պարբերաբար հայտնվել են համացանցում:

ԱՄՆ ռազմածովային ուժերի հրամանատարությունն ավելի վաղ հայտարարել էր, որ տեղյակ չեն, թե հատկապես ինչ է պատկերված տեսանյութերում, ուստի նպատակահարմար են գտել խոսել «չբացահայտված թռչող օբյեկտների» մասին. առեղծվածային անթև ինքնաթիռներ, որոնք թռչում են գերձայնային արագությամբ ու «չունեն տարբերակված թևեր ու պոչ, արտահայտված շլեյֆ»: Հաղորդվում է, որ տեսանյութերը Պենտագոնը որոշել է հրապարակել՝ հանրության շրջանում դրանց իսկության մասին սխալ պատկերացումներին վերջ դնելու համար: Սակայն այդպես էլ չի նշվել, իրականում ինչ են նկարել:

Նշվել է, որ ԱՄՆ ՌԾՈՒ-ն ավելի վաղ խոստովանել են, որ տեսանյութերն իրենց օդաչուների կողմից են արվել: Մանրամասն հետազոտությունից հետո նախարարությունը հաստատել է, որ տեսանյութերի բացահայտ հրապարակումը զինվորականների հետագա առաքելություններին չի խոչընդոտի: Տեսանյութում երևացող մարմինները շարունակում են համարվել «չբացահայտված»:

2004թ. Կալիֆորնիայի առափնյա հատվածում արված տեսանյութ / © Defence Blog

Մեկնաբանելով Պենտագոնի հայտարարությունը՝ ամերիկյան սենատի դեմոկրատների նախկին առաջնորդ, 80-ամյա Հարի Ռիդը նշել է, որ ուրախ է Պենտագոնի կողմից նյութի հրապարակման համար, սակայն դա հետազոտությունների և հասանելի նյութերի միայն մի մասն է: Նրա խոսքով՝ ԱՄՆ-ը պետք է լրջորեն և գիտականորեն դիտարկի այն և ազգային անվտանգության համար հնարավոր ցանկացած հետևանքի, և ամերիկացիները պետք է տեղեկացված լինեն:

2015թ.-ի տեսանյութ / © Defence Blog

Դեռևս տարիներ առաջ հայտնի էր դարձել, որ ԱՄՆ ՊՆ-ը 2007թ.-ից սկսած ՉԹՕ-ների ուսումնասիրության վրա 22 մլն դոլար է ծախսել («Ավիացիոն վտանգների նույնականացման ընդլայնված ծրագիր», «The Advanced Aviation Threat Identification Program»): Առաքելությունն այն ժամանակ ղեկավարում էր ռազմական հետախուզության անդամ Լուիս Էլիզոնդոն, ով խորապես համագործակցում էր ԿՀՎ-ի ու ՌԾՈՒ-ի հետ: Երեք տարի առաջ անցնելով պահեստազոր՝ նա նշել է. «ՉԹՕ-ներն իրականություն են»:

2015թ. արված մեկ այլ տեսանյութ/ © Defence Blog

Ընդ որում՝ ծրագրի նախաձեռնողը հենց դեմոկրատ սենատոր Հարի Ռիդն է՝ տիեզերագնաց Ջոն Գլենի ներկայացմամբ, ով 1962թ. փետրվարին «Մերկուրի» տիեզերանավով իրականացրել է ուղեծրային տիեզերական թռիչք: Նա վստահ էր, որ Վաշինգտոնը պարտավոր է զբաղվել ՉԹՕ-ների հետազոտությամբ՝ հատկապես ռազմական օդաչուների մասնակցությամբ, ովքեր շատ ժամանակ են անցկացնում երկնքում: Ուշագրավ է, որ ամերիկացի զինվորականները դեռևս 1969-ին էին հայտարարել, որ ՉԹՕ-ներն ուսումնասիրելու կարիք չկա:

Նախագահ Դոնալդ Թրամփն իր հերթին նշել է, որ «թող նրանք մտածեն այնպես, ինչպես մտածում են»: Նրա ընդգծել է. «Ասում են՝ տեսել եմ, կարդացել եմ, լսել եմ. այդ հարցով մի կարճատև հանդիպում եմ ունեցել: Մարդիկ ասում են, թե տեսնում են ՉԹՕ. հավատո՞ւմ եմ ես դրան. ոչ այնքան»:

Ինչ վերաբերում է գիտնականների կարծիքին, ապա աստղաֆիզիկ Լեոն Գոլուբը, մեկնաբանելով ամերիկացի օդաչուների պատմությունները, նշել է, որ «ՉԹՕ-ների հետ հանդիպման» պատճառ կարող են լինել սարքավորումների սխալմունքները կամ մթնոլորտային երևույթները, բացի այդ՝ չպետք է բացառել նաև հենց օդաչուների «նյարդային ծանրաբեռնվածությունը»՝ մեծ արագությամբ թռիչքների ժամանակ:

SETI ինստիտուտի առաջատար աստղագետ Սեթ Շոստոկն իր հերթին ընդգծել է, որ քանի դեռ ապացույցներ չկան, պետք է թերահավատորեն տրամադրվել: Ինստիտուտը զբաղվում է ռադիո և օպտիկական աստղադիտակների կիրառությամբ՝ «այլմոլորային քաղաքակրթություններից ստացվող ազդանշանների» որոնման համար: Աստղագետի խոսքով՝ ինտիտուտը որոնում է այլմոլորակայինների, սակայն դեռևս չեն հաստատում, թե գտել են:

Այլ տեսակետ ունի ՉԹՕ-ների ուսումնասիրության փորձագետ և Այլմոլորակայինների հետազոտության կենտրոնի (Նևադա նահանգ, Հիկո) ղեկավար Ջորջ Հարիսը, ում գնահատմամբ՝ ՉԹՕ-ները ճամփորդում են էլեկտրամագնիսական հարթություններում: Նրանք այդպիսով արագություն են ձեռք բերում և կարող են թռչել լույսի արագությամբ: Նրա խոսքով՝ կառավարության համար դժվար է եղել ճանաչել արժանահավատ դիտարկումների առկայությունը: Հարիսը ցավալի է համարել, որ այդ ամենը տեղի է ունենում 50-ականների վերջերից, սակայն ոչ ոք երբեք այդ մասին չի խոսել:

Պաշտոնական վարկածի համաձայն՝ ՉԹՕ-ների հետազոտության ռազմական ծրագիրն ավարտվել է 2012թ.: Սակայն, ԶԼՄ-ների հաղորդմամբ, ուսումնասիրությունները մինչ օրս շարունակվում են: Անցած հոկտեմբերին հայտնի էր դարձել, որ ԱՄՆ-ը խումբ են ստեղծել, որը, ենթադրաբար, զբաղվելու է հիպոթետիկ այլմոլորակային տեխնոլոգիաների հետազոտությամբ:

Ամենաընթերցվածը

2 րոպե
Խմբագրություն

Իրանական աղբյուրը տեղեկացնում է, որ Թուրքիան ու Բաքուն մտադրություն են ունեցել հանկարծակի հարձակում ձեռնարկել Հայաստանի Սյունիքի մարզի վրա, որպեսզի արգելափակեն Իրանի ճանապարհը դեպի Եվրոպա:

4 րոպե
Խմբագրություն

Ենթադրվում է, որ կրկնվելու է Վրաստանի օրինակը. Հայաստանը, հավանաբար, կստանա Լեռնային Ղարաբաղը՝ այս կամ այն տեսքով, իսկ Ռուսաստանը վերջնականորեն կկորցնի Ադրբեջանը:

5 րոպե
Խմբագրություն

Մատակարարված ժամկետնանց հրթիռների մի մասը չեն կրակվել և դուրս են հանվել հաշվեկշռից, իսկ մնացածն ընդհանրապես չեն կիրառվել, այդ թվում՝ 44-օրյա պատերազմի ժամանակ:

[miniorange_social_login]

Մեկնաբանությունները

Գրել մեկնաբանություն
Հաստատեք
Մուտք գործեք
Մուտք գործելով Դուք համաձայնվում եք կայքի օգտագործման օրենքների հետ.