Մինչև 18 տարեկան երեխաների հիվանդանոցային բուժումը կիրականացվի անվճար
Հայաստանի Հանրապետությունում 0-18 տարեկան երեխաների հիվանդանոցային բուժօգնությունը կդառնա անվճար։ Կառավարությունն այս որոշումն ընդունեց հունիսի 27-ին կայացած նիստում:
«Մինչ այժմ այդ հնարավորությունից օգտվում էին մինչեւ 7 տարեկան, հաշմանդամություն ունեցող, առանց ծնողական խնամքի մնացած եւ մի շարք այլ խմբերի ընտանիքների երեխաները: Փոփոխության արդյունքում պետության կողմից երաշխավորված անվճար եւ արտոնյալ պայմաններով բժշկական օգնության եւ սպասարկման իրավունք ունեցող մինչեւ 18 տարեկան շահառուների քանակը ավելանում է մոտ 200 հազար անձով։ Այս ծրագիրը կնպաստի առողջ սերունդ ունենալուն», — ասված է որոշման հիմնավորման մեջ:
Ծրագիրն իրականացնելու համար առողջապահության նախարարությանը կտրամադրվի 12 մլրդ 33 մլն դրամ:
Ծրագրով՝ 1-ին եւ 2-րդ խմբի հաշմանդամների, ժամկետային զինծառայողների ընտանիքի անդամների եւ հատուկ խմբերում ընդգրկված այլ քաղաքացիների բուժօգնության փաթեթը եւս կընդլայնվի` ընդգրկելով սրտի վիրահատական ծառայությունների եւ նորագույն թանկարժեք այլ տեխնոլոգիաներով կատարվող բժշկական ծառայությունները։
Մեկնաբանությունները