Մերձավորարևելյան պարբերականը պնդում է, որ «Իսկանդեր», այնուամենայնիվ, կիրառվել է

Հաղորդվում է, որ Արցախյան երկրորդ պատերազմի ժամանակ «Իսկանդեր» է կիրառվել անմիջապես Բաքվի ուղղությամբ: Իսրայելական «Բարաք-8» ՀՕՊ-ն այն որսացել է, սակայն դրանից անմիջապես հետո Ալիևը համաձայնել է գնալ հրադադարի:

Նորություններ

# «Բարաք-8»

# «Իսկանդեր»

# Բաքու

# Հրադադար

# ՀՕՊ

«Իսկանդեր» հրթիռի արձակումը / © Mil.ru / Հեղինակ՝ անհայտ, լուսանկարը տրամադրել է օգտատերը

Մերձավորարևելյան, ըստ էության` թուրքամետ պարբերականը, հղում անելով բարձրաստիճան պաշտոնայի խոսքերին, հայտնում է, որ Հայաստանն, այնուամենայնիվ, Արցախյան երկրորդ պատերազմի ժամանակ «Իսկանդեր» է կիրառել անմիջապես Բաքվի ուղղությամբ:

Հաղորդվում է, որ Ադրբեջանի սպառազինությունում առկա իսրայելական «Բարաք-8» հակաօդային պաշտպանության համակարգը մայրաքաղաքի երկնքում որսացել է հայկական կողմից արձակված հրթիռը:

Աղբյուրը նշում է, որ չնայած «Իսկանդերը» վնաս չի հասցրել Ադրբեջանի մայրաքաղաքին, սակայն Բաքուն որոշում է կայացրել համաձայնել կրակի դադարեցմանը: Պատճառ է համարվում այն, որ այդտեսակ հրթիռների շարունակական կիրառումը կարող էր ավելի մեծ ծավալների հակամարտության հանգեցնել:

Դեռևս հրադադարի հաստատման առաջին օրերին տեղեկություններ էին տարածվել Բաքվի երկնքում ուժգին պայթյունի մասին, որի պատճառներն այդպես էլ «անհայտ» մնացին: Դեպքը տեղի էր ունեցել Հայաստան-Նախիջևան սահմանի մոտակայքում ադրբեջանական կողմից արձակված հրթիռի հարվածից ռուսական ուղղաթիռի կործանումից անմիջապես հետո:

Նաև տեղեկություններ էին շրջանառվում, որ Բաքվի ուղղությամբ հենց «Իսկանդեր» է արձակվել, ինչից հետո է միայն Ալիևը համաձայնել կրակի դադարեցմանը: Հայկական կողմից «Իսկանդերի» կիրառումը պնդել են գեներալ Մովսես Հակոբյանը և նախկին նախագահ Սերժ Սարգսյանը: Իսկ Նիկոլ Փաշինյանը, Իլհամ Ալիևը և ռուսական կողմը հայտարարել են, որ պատերազմի ընթացքում «Իսկանդեր» չի կիրառվել:

Ադրբեջանը դեռևս 2018թ. է Իսրայելից ձեռք բերել «Բարաք-8» տեսակի համակարգեր` 12 արձակման կայաններով ու 75 հատ «երկիր-երկինք» տեսակի հրթիռներով, որոնք նախատեսված են «Իսկանդերի» և նույն կարգի հրթիռների ոչնչացման համար:

Վրիպա՞կ գտաք։ Նշեք հատվածը և սեղմեք Ctrl + Enter։