Եվրոպայի լիգայի խաղն ընդհատվել է Արցախի դրոշի պատճառով. հարցին միացել է Ադրբեջանի ԱԳՆ-ը
Խաղի ընթացքում ադրբեջանցի ֆուտբոլիստների գլխավերևում հայտնվել է դրոն՝ Արցախի դրոշը ծածանելով մարզադաշտում: Մարզիկները վրդովվել են, բայց դրոնին հարվածել չեն կարողացել:
Հոկտեմբերի 3-ին Եվրոպայի լիգայի Դյուդելանժ — Քարաբաղ ֆուտբոլային հանդիպման ժամանակ ուշագրավ միջադեպ է գրանցվել: Խաղը ընթացքում ֆուտբոլիստների գլխավերևում հայտնվել է դրոն՝ Արցախի դրոշը պտտելով մարզադաշտում:
Ադրբեջանցի մարզիկները փորձել են գնդակով հարվածել դրոնին, բայց չի ստացվել:
Վրդովվել են նաև Բաքվի ակումբի երկրպագուները, իսկ դրոշը շարունակել է ծածանվել Լյուքսեմբուրգի մարզադաշտում: Արդյունքում ֆուտբոլային հանդիպումն ընդհատվել է, կրքերը հանդարտվելուց հետո միայն վերսկսվել:
Ավելի ուշ հայտնի դարձավ, որ միջադեպի հետ կապված հարց է բարձրացրել Ադրբեջանի արտգործնախարարությունը: Վերջինս իր դեսպանին հանձնարարել է Լյուքսեմբուրգի իշխանություններից հավաստիացում ստանալ, որ սադրիչները կպատժվեն օրենքի ամբողջ խստությամբ:
Պարզվել է, որ «սադրիչները» Հայաստանի հավաքականի երկրպագուների խումբն է՝ First Armenian Front (FAF):
Տղաներն իրենց հաջող գործողություններից հետո այսպիսի նկար են հրապարակել:
Դյուդելանժ ակումբն իր հերթին հայտարարել է, որ կապ չունի միջադեպի հետ:
Մեկնաբանությունները