Օր 11. Արցախը շարունակում է դիմակայել թուրք-ադրբեջանական ահաբեկչական ուժերին. ԹԱՐՄԱՑՎՈՂ

23:20 Արցախի նախագահի խոսնակն ուշագրավ գրառում է արել. «Երբ մեր տանկերին դրոշներով ու մեծ ոգևորությամբ դիմավորում է ադրբեջանական շփոթված զորքը»։

22:00 «Հարավում աղբը գրեթե ամբողջությամբ մաքրված է». Վահրամ Պողոսյան:

20:25 Արծրուն Հովհաննիսյանը հաղորդում է, որ Շուշին կրկին թիրախավորվել է հակառակորդի կողմից։ «Հասկացեք, ձեր փախչող զորքի խայտառակության համար խաղաղ բնակիչները մեղավոր չեն». նշել է ՊՆ ներկայացուցիչը։ Հաղորդվում է նաև Ստեփանակերտում հնչած պայթյունների մասին:

19:47 ՀՀ ԱԳՆ մամուլի խոսնակ Աննա Նաղդալյանի հաղորդմամբ՝ հոկտեմբերի 8-ին Ժնևում Հայաստանի և Ադրբեջանի ԱԳ նախարարների միջև հանդիպում նախատեսված չէ. տարածվող լուրերն իրականությանը չեն համապատասխանում: Նրա խոսքով՝ չի կարող լինել այնպիսի իրավիճակ, որ մեկ ձեռքով բանակցություններ վարվեն, իսկ մյուս ձեռքով՝ ռազմական գործողություններ Արցախի և Հայաստանի դեմ:

17:19 Արցախի Պաշտպանության բանակը հակառակորդին հասցրած հարվածի ու փախուստի մատնելու նոր տեսանյութ է հրապարակել:

16:10 «Անգամ այս հաղթական պահերին էլ չպետք է թուլացնել զգոնությունը, պետք է շարունակել գործել սթափ ու հստակ՝ որպես նպատակ մեր ազգային ձգտումների իրականացումն ունենալով». Արայիկ Հարությունյանը նոր հայտարարություն է արել:

13:22 Արծրուն Հովհաննիսյանը հայտնում է, որ նավթամթերքի բազայի կողքին հակառակորդի զորանոցն էր. «Զորանոցում ունեն մոտ 200 զոհ։ Ոչ մի գրամ սրանց համար իրենց զորքը արժեք չունի». նշում է Հովհաննիսյանը:

13:17 Արցախի Պաշտպանության բանակը փայլուն գործողությունների արդյունքում ադրբեջանական բանակի համար կենսական կարևորության նավթամթերքի հերթական մեծ պահեստն է ոչնչացրել. նոր տեսանյութ է հրապարակվել:

12:35 Թշնամու գրեթե կազմալուծված զորամիավորումները խուճապից կորցրել են իրավիճակի կառավարումը և կրակում են միմյանց վրա. Վահրամ Պողոսյան:

11:19 «Հակառակորդի հերթական վառելիքաքսուքային խոշոր բազան օդ հանվեց․․․ շարունակելի». նշել է Շուշան Ստեփանյանը:

10:35 «Հակառակորդի մուտքը դժոխք». Շուշան Ստեփանյանը դիպուկ հարվածների ու հակառակորդի առաջխաղացման անփառունակ ելքի լուսանկարներն է հրապարակել:

«…և այսպես շարունակ: Վստահեցնում ենք, որ տեսագրությունն առկա է։ Այն կհրապարակվի համապատասխան պահին»։

10:00 Շուշան Ստեփանյանի հաղորդմամբ՝ գիշերվա ընթացքում հակառակորդը փորձել է առաջանալ և ամրանալ հարավարևելյան ուղղությամբ (Ջեբրայիլ չհասած), սակայն հայկական զինված ուժերի հրթիռահրետանային դիպուկ կրակով ադրբեջանական ստորաբաժանումները խոցվել են։

Առավոտյան 06:30-ին հերթական հրթիռահրետանային հարվածից հետո, մարտադաշտում թողնելով ևս 60 զոհ, ինչպես նաև 22 միավոր խոցված, մի քանի տասնյակ սարքին տեխնիկա, հակառակորդի գերհագեցած երեք բրիգադների մնացորդները խուճապահար դիմել են փախուստի։ Հաղորդվում է, որ առկա է համապատասխան տեսագրությունը:

Հայկական ստորաբաժանումների դիպուկ կրակով քիչ առաջ հարավարևելյան ուղղությամբ խոցվել է հակառակորդի վառելաքսուքային պահպանման խոշոր բազա։ Տեսանյութը՝ շուտով։ Ճակատի տարբեր ուղղություններում ստեղծվել են հնարավորություններ հաջողությունները զարգացնելու համար։

Էջանիշ

Պատճենել հղումը

Email

Տպել

Twitter

VK

Telegram