Շոտլանդիայում աճուրդի ժամանակ տեքսել տեսակի ոչխարը վաճառվել է 490 հազար դոլարով

Պատմության մեջ սա ոչխարի վաճառքի ռեկորդային գին է: «Կրկնակի Ադամանդ» անունը ստացած կենդանու բարձր գինը պայմանավորված է նրա որակական հատկանիշներով:

Օֆթոպ

# Աճուրդներ

# Կենդանիներ

# Տեքսել

Տեքսել տեսակի ոչխարներ / © Wikimedia Commons / Հեղինակ՝ անհայտ, լուսանկարը տրամադրել է օգտատերը

Տեքսել տեսակի երիտասարդ ոչխարը նախորդ շաբաթ Շոտլանդիայում աճուրդի ժամանակ վաճառվել է 490 հազար դոլարով: «Կրկնակի Ադամանդ» անունը ստացած կենդանին ոչխարների պատկառելի սերնդից է: Այն ստացվել է 86 հազար դոլար արժողությամբ խոյ-չեմպիոնի և 46 հազար դոլարանոց ոչխարի արհեստական սերումից:

Տեքսելին գնելու համար ուժերը միավորած երեք գնորդներից մեկը՝ Ջեֆ Էյքենը, խոստովանել է, որ գումարը բավականին մեծ է թվում, սակայն իրենք վճարել են, որպեսզի տիրապետեն նման լավ գեներով արուին: Նրա խոսքով՝ նախատեսվում է Կրկնակի Ադամանդի սերունդների հաշվին հետ բերել ծախսած գումարը:

Ջեֆ Էյքենն ընգծել է, որ նման արուի համար արժեր այդքան գումար հատկացնել, և դա չի անդրադառնա ֆերմերային հանրության վրա: Հաղորդվում է, որ այդ աճուրդային պայմաններում նման գնով կատարվող գնումը ոչխարների համար ռեկորդային է: Նախորդ ռեկորդը՝ 300 հազար դոլար, սահմանվել է 2009թ.:

https://www.facebook.com/britishtexel/videos/347788299724072/

Տեքսելի աճուրդը / © British Texel Sheep Society

Տեքսել տեսակի ոչխարների պատմական հայրենիքը Հյուսիսային Հոլանդիայի նիդեռլանդական կղզիներն են, որոնցից մեկի անունով էլ կոչվել է տեսակը: Տեքսելները բուծվել են դեռևս Հռոմեական կայսրության շրջանում, սակայն լայն տարածում ստացել են միայն 19-րդ դարում: Տեսակի որակը բարելավվել է անգլիական լեյսթեր և լինքոլն տեսակների հետ խաչասերման միջոցով:

Տեքսելները բարձր են գնահատվում իրենց մսային յուրահատուկ հատկանիշների, արգասաբերության, գառնուկների կենսակայունության համար: Բացի այդ՝ տեսակը լավ է հարմարվում բաց տարածքում բուծման առումով, դիմակայուն է եղանակային պայմանների և հիվանդությունների նկատմամբ:

Վրիպա՞կ գտաք։ Նշեք հատվածը և սեղմեք Ctrl + Enter։