Հայաստանի պատմության մեջ ամենամեծ բյուջեի նախագիծը հավանություն է ստացել

Կառավարությունը հավանություն է տվել «ՀՀ 2020 թ. պետական բյուջեի մասին» ՀՀ օրենքի նախագծի վերաբերյալ կառավարության օրենսդրական նախաձեռնությունը, որով նախատեսվում է հաջորդ տարի ունենալ ՀՀ պատմության մեջ ամենամեծ բյուջեն:

Նախագծի համաձայն՝ 2020 թ. պետբյուջեն եկամուտների գծով կազմելու է 1 տրիլիոն 697 մլրդ 618 մլն 538 հազար դրամ, ծախսերի գծով՝ 1,880,186,389.8 հազար դրամ: Պակասուրդը (դեֆիցիտ), ըստ նախագծի, կազմելու է 182,567,851.0 հազար դրամ:

2020թ. համար նախատեսվող պետբյուջեն դրամային և դոլարային հաշվարկով Հայաստանի պատմության մեջ ամենամեծն է։ Դիտարկենք, թե ինչ թվերից են բաղկացած եղել նախորդ տարիների բյուջեները:

Ընթացիկ տարվա պետական բյուջեն կազմում է 1,614 տրիլիոն դրամ կամ մոտ 3․4 միլիարդ դոլարից պակաս, 2018-ինը՝ 1,465 տրիլիոն դրամ կամ մոտ 3 միլիարդ դոլար։

Ստորև երևում է, որ Հայաստանի Հանրապետության պետական բյուջեն մինչև 2005 թվականը կազմել է 400 մլրդ դրամից քիչ:

Կառավարության հավանությանն արժանացած օրինագծով նախատեսվում է նաև, որ ՀՀ կենտրոնական բանկը՝ 2020 թ. ընթացքում, օրենքով վերապահված իրավասությունների սահմաններում, դրամավարկային քաղաքականության վերաբերյալ որոշումներ ընդունելիս առաջնորդվի 12-ամսյա գնաճի 4 +/-1.5 %-ային կետ տատանումների թույլատրելի միջակայքում նպատակային ցուցանիշով: