Թուրքիայի, Ադրբեջանի և Պակիստանի հատուկջոկատայինները վարժանքներ կանցկացնեն սեպտեմբերին
Հավանական է համարվում, որ խոսքը «Կովկասյան արծիվ» զորավարժության մասին է, որին այս տարի Վրաստանի փոխարեն կմասնակցի Պակիստանը:
Ադրբեջանի պաշտպանության նախարար Զաքիր Հասանովը հայտարարել է, որ սեպտեմբերին Ադրբեջանի, Թուրքիայի և Պակիստանի հատուկ նշանակության ստորաբաժանումները համատեղ զորավարժություն են անցկացնելու:
Հայտնի է, որ նշված երկրների փորձագիտական խմբերն արդեն Ադրբեջանում են, նրանք ներկայումս ուսումնասիրում են անցկացվելիք զորավարժությունների տեղանքը:
Հավանական է համարվում, որ խոսքը «Կովկասյան արծիվ» զորավարժության մասին է` Պակիստանի ներգրավմամբ: Հատուկջոկատայինների այս վարժանքներն անցկացվում են յուրաքանչյուր տարվա սեպտեմբերին` սկսախ 2009-ից, Թուրքիայի, Վրաստանի և Ադրբեջանի մասնակցությամբ, նրանց տարածքներում` հաջորդաբար:
Թուրքիայի և Պակիստանի միջև գործընկերությունը խորացել է հատկապես 2016թ.-ից սկսած, երբ պակիստանցի զինվորականները սկսեցին վերապատրաստում անցնել Թուրքիայում: Անկարան Պեկինից հետո Իսլամաբադի զենքի ամենախոշոր մատակարարն է, իսկ 2020թ.-ից սկսած մշակվում է երկու երկրների միջև երկքաղաքացիության համաձայնությունը:
Արցախի դեմ սանձազերծած պատերազմից հետո Ադրբեջանին աջակցող Պակիստանում սկսեցին ակտիվորեն քննարկել Քաշմիրի հարցի (վիճելի նահանգ Հնդկաստանի կազմում) լուծմանը Թուրքիայի մասնակցության անհրաժեշտության մասին:
Մեկնաբանությունները