Հուլիսի 29-ից օգոստոսի 10-ը տեղի կունենան թուրք-ադրբեջանական լայնածավալ զորավարժություններ՝ մարտական կրակով (upd.)
Մարտավարական և թռիչքամարտավարական զորաշարժերին մասնակցելու են Թուրքիայի և Ադրբեջանի զինված ուժերի անձնակազմեր, զրահապատ տեխնիկա, հրետանային միջոցներ և ականանետեր:
Օգոստոսի 1-ից 5-ը Ադրբեջանի տարածքում՝ Բաքվում և Նախիջևանում, անցկացվելու են Թուրքիայի և Ադրբեջանի ցամաքային զորքերի համատեղ մարտավարական զորավարժություններ: Հուլիսի 29-ից մինչև օգոստոսի 10-ը Բաքվում, Նախիջևանում, Գյանջայում, Քյուրդամիրում և Եվլախում ընթանալու են երկու երկրների ռազմական ավիացիայի թռիչքամարտավարական համատեղ զորավարժություններ՝ մարտական կրակով:
Հաղորդվում է, որ ցամաքային զորքերի և ռազմաօդային ուժերի ներգրավմամբ թուրք-ադրբեջանական համատեղ լայնամասշտաբ վարժանքներն իրականացվելու են երկու երկրների միջև ռազմական համագործակցության վերաբերյալ համաձայնագրի շրջանակներում: Թուրքական ստորաբաժանումներն այսօր արդեն ժամանել են Նախիջևան:
Զորաշարժերին, ինչպես նշվում է, մասնակցելու են Թուրքիայի և Ադրբեջանի ԶՈւ-երի անձնակազմերը, զրահապատ տեխնիկան, հրետանային միջոցներ և ականանետեր: Օդային գործողություններն իրականացվելու են երկու երկրների ռազմական ավիացիայի և հակաօդային պաշտպանության (ՀՕՊ) միջոցների մասնակցությամբ: Ներգրավված կենդանի ուժի և ռազմատեխնիկայի քանակի վերաբերյալ տեղեկություններ չեն հաղորդվում:
UPD. Ռուսաստանի Հարավային ռազմական շրջանի ավելի քան 5 հազար զինծառայողների մասնակցությամբ մեկնարկել են երկկողմանի գումարտակային մարտավարական զորավարժություններ: «Կովկաս-2020» վարժանքների նախապատրաստման շրջանակներում զորաշարժեր են տեղի ունենում Դաղստանում, Հյուսիսային Օսեթիայում, Չեչնիայում, ինչպես նաև ՀՌՇ-ի աբխազական և հարավօսական բազաներում:
Զորավարժությանը մասնակցում են մոտոհրաձգային, տանկային, հրետանային զորքերը՝ մարտական կրակի ուղեկցությամբ: կրակային աջակցությունը և մարտավարական օդային դեսանտի ռազմական խմբերի անձնակազմի առաքումն իրականացնում են Շրջանի ՌՕՈւ և ՀՕՊ միավորումների ինքնաթիռներն ու ուղղաթիռները:
Մարտական կրակի վարման փուլերում գործարկվելու են հրետանային դիվիզիոնները և համազարկային կրակի «Տորնադո», «Գրադ», ինքնագնաց «Մստա-Ս», «Գվոզդիկ», «Ակացիա» ռեակտիվ համակարգերի մարտկոցները: Ներգրավված են լինելու նաև Տ-72Բ3, Տ-90 տանկեր և հետևակի մարտական մեքենաներ՝ ՀՄՄ-3:
Մեկնաբանությունները