Հաղորդվում է Հադրութի Տող գյուղի մոտակայքում վերսկսված մարտերի մասին. հնարավոր է՝ տեղեկատվական սադրանք է (upd.)
Ադրբեջանական մի շարք լրատվամիջոցների տվյալներով՝ Հադրութի Տող գյուղի մոտակայքում հայ և ադրբեջանցի զինվորականների միջև մարտերը վերսկսվել են։ Տեղեկություններ են տարածվում նաև երկու կողմից զոհերի, գերիների և վիրավորների մասին։
ՀՀ Պաշտպանության նախարարությունը հայտնում է, որ, ադրբեջանական մի շարք լրատվամիջոցների տվյալներով, Հադրութի Տող գյուղի մոտակայքում հայ և ադրբեջանցի զինվորականների միջև մարտերը վերսկսվել են։ Տեղեկություններ են տարածվում նաև երկու կողմի զոհերի և վիրավորների մասին։
ՊՆ-ն հայտարարել է, որ Արցախի Պաշտպանության բանակը խստորեն պահպանում է հրադադարի ռեժիմը, ՊԲ որևէ ստորաբաժանում ադրբեջանական զինված ուժերի վերահսկողության տակ գտնվող Տող գյուղի հատվածում որևէ գործողության չի մասնակցել: Նշվում է, որ Արցախի ՊԲ ստորաբաժանումների հետ կապված որևէ արտակարգ միջադեպ չի գրանցվել։
Պաշտպանության նախարարությունը հավելում է, որ հայկական կողմը փորձում է հավելյալ տեղեկություններ ճշտել և չի բացառում, որ տարածվող լուրերը կարող են ադրբեջանական տեղեկատվական սադրանք լինել։
Նշենք, որ ժամեր առաջ ադրբեջանական աղբյուրները սկսել են հաղորդել Հադրութի շրջանի Տող գյուղի հատվածում հայ և ադրբեջանցի զինծառայողների միջև վերսկսված մարտերի մասին: Հաղորդվում է, որ ադրբեջանական կողմից կա 2 զոհ, 1-ը գերի է ընկել, իսկ հայկական կողմից, նույն աղբյուրների տվյալներով, 6 հայ զինծառայող է սպանվել, 6-ը գերի են ընկել: Ավելի ուշ ադրբեջանական տելեգրամյան ալիքները գրեցին նաև Զանգելանի հատվածում տեղի ունեցած միջադեպի մասի:
UPD. Տեղեկություններ են հաղորդվում, որ Հադրութի մոտակայքում միջադեպը տեղի է ունեցել ադրբեջանցի զինծառայողների միջև, ովքեր կրակել են միմյանց վրա: Այս պահին 3 զոհի մասին է նշվում:
Մեկնաբանությունները